Waxaa la yiri sidaaad isu taqaanno (isu haysato) ma tihidee, waa siday dadku (bulshadu) kuu taqaan, waa Illaah mahaddi in Ex-Sheikh Ibraahin aynu maanta si fiican u naqaanno sal iyo baar. Wixii uu ku wacdiyi lahaa qurbo-joogta Ogadeniya S/Galbeed qoraalkeenna qaybta dambe ayaynu ka heli doonnaa balse aan ku billowno heerarkii uu ka soo maray ku gabbashadii diinta iyo sida Illaahay u fashiliyay.

Gumaysiga Addisababa wuxuu mar walba isku dayaa siduu bulshada Ogadeniya S/Galbeed ugu furi lahaa tashuush noocyo badan leh wuxuuna u xulanayay mar kasta ruux uu isleeyahay wuu gadmi karaa wuuna xambaari karaa farriimaha cudurka(virus) xambaarsan ee isku dirka iyo kala qaybinta ah iyo weliba u nacamlaynta gumaysiga.

Haddaba Ex-Sheekh Ibraahin dheere wuxuu ahaa nin in badan u gadmay gumaystaha una suuq geeyay farriimihii loo dhiibi jiray isagoo huwaday shaati wadaadnimo (Sheekhnimo) taas oo uu dad badan ku khalday mawduucyo diini ah oo uu si khaldan u isticmaalay, in la xuso way habboon tahaye dadkii xajkii aaday sannadkii 2008 dabayaaqadiisii baa markhaati ka ahee.

Wuxuu ku wareegeystay teendhooyinkii xujayda ay deggenaayeen isagoo ujeeddadiisu ahayd inuu isu tuso inuu dadka uga nasteexaynayo khatarta ay leedahay haddii ururka ONLF la taageero iyo ciqaabta ka dhalan karta lacagta la siiyo ururkaas. Wuxuu ku sheegay ururka inay yihiin kuwo ilaahay ka furtay oo aan diin lahayn. Aad buu ololahaas isugu dhabar jabiyay inuu ka gado xujaydii Soomaalida ahayd meel kastaba ha ka yimaadeene, wuxuu ku xisaabtamayay in intaas oo xujay soomaali ah oo farriinta u qaadda ay uga muhiimsan tahay idaacad ama warbaahin kasta meelihii farrimahaas aad loo geeyay waxaa ka mid ahaa waddanka Maraykanka iyo Waddanka Soomaaliya.

Qaar ka mid ah xujaydii oo run mooday Ibraahin dheere wacdigiisii ayaa in muddo ah dadka waxay u sheegayeen in ay ONLF tahay cilmaani gaala raac ah oo aan diin lahayn. Waxaa ugu sii darraa Soomaliya gudaheeda, gaar ahaan ururradii diiniga ahaa ee Soomaliya ka jiray sidii ay saamaynta ugu yeelatay ololihii Ex-Sheekh ibraahim uu u suuq geynayay gumaystaha cadawga tigreega taasoo ahayd dacaayaddii ka dhanka ahayd Xaq u dirirka Jabhadda waddaniga Xoraynta Ogadeniya. Waxayna sababtay in dhibaatooyin badan soo gaaraan dhammaan dadkii lagu tuhmayay taageerada ururka ONLF, in badan oo dadkaas ka mid ahna waxaa xasuuqay ururrada magaca diinta watay ee soomaaliya.

Wax walba xilligiisa ayuu soo baxaaye, maxaa dadkii shalay teendhooyinkii Xajka uu Ibraahin dheere ugu tegey ay maanta Ogadeen?, dadkii muxaadarada, ujeeddada qarsoon ahayd, uu u akhriyi jiray maxaa u soo baxay?. Fur Link Qabta 1aad Qabta 2aad

Xaqiiqo waxaa ah, ninkaas safka culimmada ugu jiray shacabweynaha Ogadeniya S/ Galbeed inuu ahaa halistii ugu weyneyd ee halganka Ogadeniya soo mara. Bal ruux leh sheekh baan ahay, oo muxadarooyinka waaweyn lagu ixtiraamayo, oo leh safkii halganka ayaan ku jiraa, diin baan u dagaallamayaa iyo magaca rabbi inuu kor ahaado ayaan doonayaa, haddii wax u qarsoon yihiin, ujeeddana uu u fulinayo qolo Tigree ah, waa la garan karaa dhibaatada uu sababi karo wadaad ku sheeggaas.

Khaa’inse ma liibaanee ibraahin dheere wuu fashilmay inkastoo wixii uu geysan karay uu bulshada u geystay. heerkii uu rabayse sidaas ma ahayn ee wuxuu ku hammiyay inuu intaas ka sii badiyo qancinta tigreega, balse waxaa ka soo dhex galay nimankii tigreega ahaa ee uu hawsha u hayay oo isu tusay inay uga faa’iidaystaan si kale maadaama uusan heerkii laga filayay uusan u dhibaatayn karin halganka.

Qorshihii u deggenaa gumaystaha ayaa waxay ahayd in Ibraahin dheere bulshada ku siro diinta isla markaana shacabku taageerada ay u hayaan ururka ONLF uu uga digo xag diiniyan, dhallinta dhiiggooda u huray dadkooda iyo dalkoodana wiswis uu ku furo dhimashadooda, isla markaana uu olole xooggan u galo sidii uu u kasban lahaa dhallinta u halgamaysa waddanka, iskuna dayo inuu ka dhaadhiciyo ii ay ku soo biiraan ciidammada uu kolba ka keensanayay gudaha Soomaaliya.

Waxaa kaloo waajibaadka tigreegu siiyeen ka mid ahayd in ibraahim dheere geed dheer iyo mid gaabanba u fuulo sidii ururkiisa iyo ururka ONLF ay u midoobi lahaayeen. Tigreegu ujeeddadiisu way caddayd xilligaas oo waxay raadinyeen in laga maqlo codsigooda ahaa “ku dara ururka JWXO liiska Argagixisada caalamka, waana midda ay rabeen inay u maraan Ibraahin Dheere. Waxaa kale oo ay is tuseen ibraahim dheere iyo tigreegu in haddii ay suurto geliweydo midnimadaas ay ciyaaraan cayaar kale oo la yiraahdo Golaha Sare ee ONLF, warbaahintana laga buunbuuniyo arrintaas. Ibraahim dheere wuxuu xoogga saaray laba arrimood kaddib markay ONLF dheg jalaq u siin weyday.

1.In jaaliyadaha dibadda uu ku wacyi geliyo in aysan taageerin halganka ay wado Jabhadda waddaniga Xoraynta Ogadeniya JWXO isagoo shaar diimeed u xidhanayay. iyo
2.buunbuunin farriin la yiraahdo garab gole-sare
Aan eegno Ibraahim Dheere wixii uu ka yiri dagaalkii ka dhacay aagga Dhanaan Janaury 2009 bal si aynu u qiimayno waraysigii ay la yeesheen war-baahintii Muqdisho ee xillagaas
Fur Link

Wax badan baa laga fahmi karaa qoraalkaas haddii aad iyo aad loo dhuuxo.
qoraalkaas arrin aan ku qornayn oo qarsoon baa jirta ruux walbana uu si sahlan u fahmayo, Tigreegu ma doonaynin inuu Dr. Doolaal ka soo baxo gobolka. Markii Tigreegu ogaaday in kooxdii Ibraahin dheere ee Itixaadka ahayd iyo Dr Doalaal ay safar u soo yihiin dhinaca Soomaaliya ayay go’aansadeen inay laayaan, sidaas ayayna ku xasuuqeen dhammaan safarkii uu Dr. Doolaal ka mid ahaa. Sababta uu Tigreygu u qaatay go’aankaasna waxay ahayd heshiiskii ay isku ogaayeen Ibraahim dheere iyo saaxiibbadiis ayaa waxay ahayd in Itixaadku Dr. doolaal gudaha Ogadeniya S/Galbeed geeyaan, kaddibna ay burbur aan laga soo kabannin gaarsiiyaan halganka xaqa ah ee shacabka Ogadeniya.

Haddii ay suurto gal ay noqon kartana ayba soo af-jaraan halganka gobannimo doonka ee bulsha Ogadeniya Qorshahaasi wuxuu ahaa riyo khalad la isaga dhaadhiciyay oo shacab bislaaday iyo urur gaamuray oo samir badan loola kacay, Tigreygii waxaa u soo baxay in albaabkaas uu iska soo xiray. Mar haddii aan hawshii (wax yeelidda halganka) aan gudaha Ogadeniya looga qaban karin sidii horey loo qorsheeyay, wuxuu qaatay tallaabadaas waxashnimada ah ee ahayd inuusan safarkaasi cidna ka bixin,
Qorshe kastaa oo bini’aadam dejiyo waxaa ka sii weyn midda Rabbiye, waxaa la Rogmaday dhammaan wixii khaa’innimo ahaa ee ay tigreega iyo Ibraamin is tuseen. Tigreegii xaqiiqadii way arkeen.

Wax cayaar ah oo Ibraahim maqnaashihiisu ku hirgalaya inaynan jirin. Haddaba culaysyada badan oo gudihii Itoobiyada kale ku yimid ayaawaxaa loo baahday dacaayado Addisababa laga buufiyo, taas baana muhiim u noqotay tigreegii. waxayna fareen inuu iska soo xaroodo dad wixii uu heli karana horey u soo kaxaysto, waana uu aqbalay.

Waynu ka dheregsannahay sidii ay wax u dhaceen intii ay iska xaroodeen Ibraahim Dheere iyo asxaabtiisii. Haddaba tigreegii laba arrimood baa ay u kala qaadeen dacaayadda ay u isticmaalayaan ibraahim dheere iyo saaxiibbadii. Midda hore waa in loogu jimo-tuurto dhammaan shucuubta kale ee Itoobiya si loo tuso urur hub watay oo dagaal xoog leh kula jiray maamulka tigreega in maanta la soo af jaray oo ay nabad qaateen, wixii ay aaminsanaayeen oo dhanna ay ka tanasuleen oo ay qaateen dastuurkii itoobiya. Midda kale ee dacaayadda ah ee loo isticmaalay soo xarooshahooda ayaa ahayd in bulshada Ogadeniya S/Galbeed loo diro farriimihii la yaqaannay ee kolba magac loo bixin jiray, Farriintaa oo markan loo doortay inay noqoto “NABAD NABAD NABAD, baa loo baahan yahay maanta.

Waan dhammaannay, dadkeennu cuntay rabaan, nolol bay rabaan, horumar bay rabaan iwm” farriintaas dambe ee bulshadeenna loogu talo galay, miyay tahay mid macno samaynaysa? Kolley idinkaa ka jawaabi, balse aniga qoraalkayga aan isku weydiiyo ninka nabadda u baahan ma Tigreebaa mise waa Ogadeniya? Xaqiiqadu waxaa weeye Tigree nabad uusan u baahnayn anigoo Ogadeniya ah uma baahni, Ninka dhiilku u buuxana waa isaga Tigreega ah, welina ma uusan garan midabka ay leedahay nabaddu.

Ibraahin dheere hadalladiisii aan soo qaato uu ku lahaa “dagaalkii waan ku faa’iidnay” (waa daagaalkii maxaakiimta iyo Itoobiya), xilligaa uu hadlayay balshada Soomaaliya dareenkeeda ayaa meel sare marayay, aad bayna u xiiseynayeen muxaadaro noocaas oo kale ah, waxaad ka heli doontaa laba qaybood oo dhagaysi ah Fur Link Qabta 1aad Qabta 2aad

Ibraahin dheereDagaalkii waagaas wuu ka hadlay. Haddaba si uun ha isu qabadsiiyo muxaadaradaas dagaalka waa lagu faa’iiday uu lahaa iyo bilahan dambe wixii uu shubayay.

Masaajiddada jigjiga wuu ka khudbeeyay Ibraahin dheere salaadihii jimce iyo salaado kalaba, waan garan karnaa in wax sidaa u sii qiimo leh oo diin ah uusan ka hadlaynin, xataa haddii tigreegu u oggolaadaan inuu siduu doono u hadlo , asagaa shakhsiyan ugu dhiirran Karin xaqiiqada inuu sheego.

Haddii aan isbarbar dhigno waqtigii uu ka khudbayn jiray Seattle, Washington iyo Xaruntii golaha shirarka ee Minneapolis kulan diimeedyadii lagu qaban jiray iyo khudbooyinka uu wakhtiyadan ka akhriyo gudihii waddanka maxaa kuu soo baxaya? Wacdi noocee ah buu u hayaa Ibraahin dheere Qurbo-Joogta Ogadeniya.

Haddii kulan diimeedyadii uu ka muxadareen jiray oo kale maanta khadka Telefoonka loogu soo xiro? Haddii maanta kulan diimeedyada lagu qabanayo Maraykanka ama Yurub lagu soo xiro, yaa dhegeysan lahaa? Waan hubaa in ruuxii uu sheekh u ahaan jiray ee dhegaha u raaricin jiray in maanta haddii la yiraahdo Ibraahin dheere ayaa na wacdiyi ee kaalay uu ku jawaabayo “Mar I dage Allaha dago, mar labaad I dagase aniga allaha I dago”. Waa xaqiiqa inuu mar, laba, saddex iyo afarba uu siray dadka balse maanta bulshadii taqaannay Ibraahin dheere hal kalmad-na ha noqotee aynan ka akhrisanaynin.

Muxaadaradiisa waxaa dhagaysan lahaa, haddiiba la soo xiriiriyo kuwii awalba Tigreyga qurbaha u joogay iyo safaaradaha Tigreyga, wacdigiisu kolleyba wuxuu ka koobnaan lahaa farriimihii gumaysiga ee ahaa NABAD NABAD NABAD, dadkeennu cunto ayuu u baahan yahay, waan dhammaannay, horumar baan rabnaa, dawladda la shaqeeya, ilaahay aan ka cabsanno oo dagaalka aynu ka deyno dawladda Itoobiya, xuquuqdeennana dastuurkaa qorayaa, iwm.

Waxaan ku soo gabagabeynayaa qoraalkan in Ibraahin dheere uu nala dhaafay khatartii uu diinta ugu gabbanayay halganka taas oo dadka aan xog ogaalka ahayn shaki badan gelin jirtay sababtoo ah wuxuu ku doodi jiray inuuTigreyga dagaal xaq ah kula jiray inuu diinta u dagaallamayay, iwm. Maanta wuxuu buuxiyay safkii Tigreega waana midda ugu khatarta yar ee Ibraahin dheere uu bulshada halgankeeda xaqa ah ku samayn karo.

Waxaannu leennahay haddii uu magac Sheekh ah lahaan jiray Ibraahin dheere , haddii uu halganka mindi ku ahaan jiray maanta waa soofihii ay bulshadu ku soofaysan lahaayeen mindiyaha cadawga lagu gawracayo Rabbi baa mahad iska leh!
Geesiyaasha dhiiggooda iyo naftooda u huray bulshada Ogadeniya badbaadinteeda ayaa guusha leh!

Haleelo Waa Magow.

Haleelo.com
haleelo@hotmail.com